Arte postal na honra de Rosalía
Posted on: Febreiro 28, 2016
O Colexio Cardenal Cisneros, a Oficina Principal de Correos e a Sociedade Filatélica Miño de Ourense únense para conmemorar o Día de Rosalía, centrados na arte postal, forma de expresión artística que consiste en decorar as cartas ou paquetes que circulan a través dos servicios postais.
Alumnos do centro educativo, seguindo a proposta da AELG (Asociación de Escritores en Lingua Galega) deseñaron postais cun poema da escritora ilustrado con debuxos; co apoio da Sociedade Miño as palabras de Rosalía voarán nas cartas espallando a obra da poetisa atendendo ao lema da convocatoria deste ano: #mobilizarosalía.
Ás 12 da maña do mércores 24 de febreiro, alumnos de Cisneros e membros da Miño acudiron á Oficina Principal de Correos, onde foron recibidos pola directora, para cancelar os seus traballos co cuño turístico que reproduce a fonte das Burgas.
Deste xeito quixeron render unha homenaxe a Rosalía de Castro no día en que se conmemora o aniversario do seu nacemento, unindo a cidade de Ourense coa poetisa a través da divulgación das súas obras convertidas en arte postal con sinatura ourensá.
Entregaron sendos ramos de camelias á directora da Oficina, Leonor Otero e a socia nº 1 da Miño, Pilar Gallego, e repartiron flores feitas polos alumnos ao persoal da oficina.
Posteriormente as cartas chegaron por correo ao centro e os alumnos fotografáronse coas súas obras.
Un resumo de todo o acontecido podedes velo no seguinte vídeo:
?
CARDENAL CISNEROS OURENSE 
Deixar unha resposta